ثلاث رسائل فكاهيّة أرسلتها عام 1972 إلى الصديق الياس المقدسي (بو العيس)، وكان ، رحمه اللـه، يفرح بهذه الرسائل كثيراً.
ـ1ـ
مِشْتَقْلَكْ يا أَعْظَمْ خَيّ
وْمِشْتاق لْرَنِّةْ صَوْتَكْ
وْمِشْتاق لْمَجْرُورْ الْمَيّ
الْمارِقْ مِنْ قِدَّامْ بَيْتَكْ
ـ2ـ
بْغَمِّضْ عَيْني لَمّا بْنامْ
وِبْصَفِّي قِحّ وْشَنْخِرْ
وْإِحْلَم إِنَّكْ طَيْر حْمامْ
بْتِمُّو قَشِّه وْبِيزَمِّرْ
ـ3ـ
اللُّبْنانِيِّي.. يا بُو الْعِيسْ
نَزْعُوا الطَّبْخَه بِالْمَرَّه
هَوْن اللُّبْناني تلْبِيسْ
أَزْعَرْ.. عَقْلاتُو مْشِرَّه!
ـ4ـ
بْمَلْبُورنْ وِبْسِيدْني مَمْنُوعْ
يِدْخُل لُبْناني عَ الشّغْل
بْحَيْث اللّبْناني مَصْرُوعْ
بَاعْ الْقِيمِه بْرَبْطِةْ فِجْلْ
ـ5ـ
دَخْلَكْ سَلِّمْ عَ أَنْطُونْ
خِطَّار وْعَ ناياتُو
وْعَ خَيَّكْ طُوني الْمَلْعُونْ
اللِّي بْتِدْوِخْني دَقَّاتُو
ـ6ـ
وْسَلِّمْ عَ أُمّي وْبَيِّي
وْعَ سِتِّي وْجِدِّي طَنُّوسْ
وْقِلُّنْ: عِنْدِي حِنِّيِّه
بْتِقْتُلْ جَحْشَيْن وْجامُوسْ
ـ7ـ
وِغْنانِيكْ يا بُو الأَحْبابْ
حِفْظُوها نِصّ الإِنْكلِيزْ
عَ فَيْقَه كِيفْ الأَصْحابْ
بُو سامي وْجِرْس وْعَزيزْ
ـ8ـ
صَرْلي مُدِّه بْحُورْ وْدُورْ
وْباكُلْ خَسّ وباتِنْجانْ
وْصَدِّقْني إِنِّي مَسْرُورْ
لَكِنْ يا مَحْلَى لُبْنانْ
ـ9ـ
وْبِالآخرْ بِهْدِيكْ سْلامْ
قَدّ زْغَرْتا وِالْفُوَّارْ
وْأَيْطُو الْـ كِنَّا فِيها نْنامْ
وْمِجِدْلَيَّا مَعْ عكَّارْ
**
