عمي باخوس

أرسلتها إلى عمي باخوس بعيني عام 1972
ـ1ـ
عَمِّي وْمَرْتُو كِيفْ الْحالْ؟
فْرِحْت كْتِيرْ بْمَكْتُوبْكُنْ
بْسِيدْني طَلْبُوا شَيْخ رْجالْ
ما لَقْيُوا غيرْ مَحْسُوبْكُنْ
ـ2ـ
تا خَبِّرْكُنْ عَنْ رُوبيرْ
ناوِي يِرْجَعْ عَ الأَوْطانْ
وْهَوْنيك بْيِعْمِلْ شُوفيرْ
عَ دِبَّابِه أَوْ عَ تْرانْ!
ـ3ـ
خَيِّي أَنْطُون وْجِرْجِي
مَعْ نِسْوانُنْ وِطْفالُنْ
مِتِّفْقِينْ.. وْشُو فِرْجِه
نِعْمِةْ أَللـه رِسْمالُنْ
ـ4ـ
عَ عِيد الْمِيلادْ جانِي
مِنْ حَنَّا كَرْت بُوستالْ
بِالسَّلامِه هَنَّانِي
وِبْيِسْأَلْني كِيفْ الْحالْ؟
ـ5ـ
وْهَوْني قِلِّةْ ما فِي دْوابْ
وْما فِي مِعْزِي وِشْحاتِيلْ
يِعْنِي يا عَمِّي الْقِصَّابْ
الْـ مِتْلَكْ ما بْيِعْمِلْ زَنْكيلْ
ـ6ـ
سَلِّمْلي عَ عَمَّاتِي
وْعَ جدِّي وْبَيِّي وْأُمِّي
وْعَ سِتِّي اللِّي بِحْياتي
بِفْدِيها.. وْعَ وْلادْ عَمِّي
ـ7ـ
وْبِالآخِرْ بِهْدِيك سْلامْ
مِنْ قَلْبي وْروحي وْعَيْني
وِبْقِلَّكْ عِنْد الْخِتامْ
دمْت لْشَرْبِل الِبْعَيْنِي

**