لبيبه

ـ1ـ 

لبيبه بَدّا عَريسْ

يْكُون مْفَصَّلْ ع قْياسا

صارتْ هالنسوان تقيسْ

من كْعاب جْرَيْها لْراسا

حِضْيُولا بْواحد تَعيسْ

بْيِسْكَر وبْيِشْرَب كاسا

تْزوجها.. صار العريسْ

وْما صَدَّق إِنّو باسا

ـ2ـ

وْلَبيبه بْتُوزن قنطارْ

وْعريسا شي قنطارَيْن

عَ تَخْتُنْ وَصّوا السّمسارْ:

بدّنا تَخْت يْساع تْنيْن

لمّنْ قاسُنْ فكرو احْتارْ

وقالْ بْسرّو: يِخْزي العينْ

بَقْره وْعم يِرْكبْها حْمارْ

قصّه ما شافِتْها عَيْن

ـ3ـ

وبعد جمعه جاب سْريرْ

مش معروف عرْضو مْن الطّولْ

قَلُّنْ: تَخْتي بْيحمل زيرْ

قالولو: من شو معمول؟

قلّن: خشَبْ.. فرحوا كْتير

وْنطّوا فوقو ومش معقول

ما سمعوا غير التكسير

وغولي عم بِتْدَحْرِج غولْ

ـ4ـ

قالولو: تَخْتك مغشوش

تْكسّر من أوّل نطّه

ما بْيِسْتاهل خمس قروش

مُشْ ممكن يحمل بَطّه

قلّن: انتو تْنَيْن وْحوشْ

زيجِتْكُن أَكْبَر غلطَه

بهالبيت المليان كْروشْ

الْجازِه لعبةْ قِطّه وفارْ

وْكيف بَدّو يْلاقي القِطَّه

**